ذرا سوچئے!
سعودی عرب نے بیرونی حاجیوں کو اس سال حج پر آنے سے منع کردیاہے وجہ وبائی مرض کا پھیلاؤ بتلایا گیا ہے۔اس وباء کو روکنے کے لئے نہ کوئی ویکسین ہے اور نہ کوئی دوا۔ احتیاطی تدابیر میں ہاتھ منھ دھونے،آنکھ ناک اور منھ کی حفاظت اور تیسرے تالہ بندی اور لاک ڈاؤن۔
لاک ڈاؤن نے غریبوں اور معاشی طور پر پسماندہ خاندانوں کی کمر توڑ دی ہے۔وہ مدارس جو رمضان کے چندے پر چلا کرتے تھےاب وہ مدارس بھی اپنے اساتذہ کو فارغ کر رہے ہیں۔وہ ائمہ کرام جن کا وظیفہ جمعہ کے چندے سے وابستہ تھا مساجد کے بند کئے جانے کی وجہ سے بری طرح متاثر ہے۔ہزاروں خاندان ایسے ہیں جو منھ سے مانگ نہیں سکتے لیکن ان کے چہرے بولتے ہیں ۔اسی سلسلے میں وہ غریب والدین بھی ہے جن کے گھر جوان بیٹیوں کے نکاح ہونے ہیں، ایسے مریض بھی ہے جن کا علاج مشکل اور مہنگا ہوگیا ہے، ایسے اساتذہ بھی ہیں جو غیر امدادی اسکولوں میں پڑھا رہے تھے ، رکشہ ڈرائیورس، روز محنت مزدوری کرنے والے لوگ سب کے سب لوگ پریشان ہیں ۔
جن حضرات نے ایک مرتبہ حج کرلیا ہے اور اس فرض کی ادائیگی کے بعد انہوں نے حج پر جانے کا مزید ارادہ کر لیا تھا ان حضرات کے لئے یہ اطلاع ہے کہ حکومت سعودیہ نے بیرونی حجاج کو حج پر آنے سے روک دیا ہے۔حج کمیٹی اور ٹورس والوں نے رقمیں واپس کرنا شروع کردی ہے۔ ایسے حضرات جو زندگی میں دوسری مرتبہ یا اس سے زائد حج کی تیاری میں تھے ان کے لئے ایک ادنیٰ مشورہ یا تجویز ہے ۔

شرک ایک ایسی برائی ہے جس سے اسلام کہیں بھی اور کبھی بھی سمجھوتا نہیں کرتا ،یہ ایسا ناقابل معافی جرم ہے کہ اگر اسی حالت پر انسان مر جاتا ہے تو خدا اس کی مغفرت نہیں کرے گا۔ شرک عظیم ترین گناہ ہے اور افسوسناک جہالت بھی یہ اندھیرا ہے اور روشنی اور اندھیرا ایک جگہ جمع نہیں ہوتے اسی لئے توحید اور شرک میں اتحاد نہیں ہو سکتا ،جہاں توحید ہے وہاں شرک نہیں رہتا جہاں شرک ہوگا وہاں توحید کا سوال نہیں۔ یہ بات بالکل صاف ہے کہ کہ توحید مسلمانوں کا بنیادی عقیدہ ہے اور شرک اس کی ضد ہے۔ اس لیے فطری اور قدرتی طور پر مسلمان شرک بیزار ہوتا ہے اور اسے ایسا ہونا ہی چاہیے اب ہندوستان جیسے ملک میں جہاں مذہبی آزادی کے حق کو دستوری طور پر تسلیم کیا گیا ہے اور اسی کے تحت پتھروں ،درختوں ،دریاؤں اور جانوروں کی پوجا کرنے والوں پر قانونی پابندی عائد نہیں کی جاسکتی تو آخر کس طرح خدائے واحد کی بندگی پر یقین رکھنے والوں کو پابند کیا جا سکتا ہے کہ وہ مشرکانہ خیالات اور افکار پر مبنی کسی گیت کو قوم و وطن کے نام پر قبول کرلیں ، اگر اپنے عقیدہ اور عمل کے معاملے میں ہندوستان کے شہری آزادہے تو کس منطق سے مسلمان کو قائل کیا جا سکتا ہے کہ وہ وطن کی خدائی کے تصور کو گلے لگا لے ، حالانکہ وہ اس کے عقیدہ توحید کی ضد ہے۔ اگر ایسا کرنا ہے تو ملکی دستور ،شہری حقوق اور جمہوریت کو دیش سے نکال دو اور کوئی ایسا دستور بناؤ جس میں من مانی کرنے کا حق کسی ایک طبقہ ایک پارٹی کو دے دیا گیا ہوں ،بصورت دیگر وندے ماترم جیسے گیت کو سب کے لئے لازم قرار دینے کی کوئی گنجائش نہیں ہے ۔معلوم ہونا چاہیے کہ مسلمانوں سے وندے ماترم گانے کا مطالبہ کرنا اسلام دشمنی کے ساتھ ساتھ ملک دشمنی بھی ہے آخر کس ملک سے اس سے بڑی دشمنی اور کیا ہو سکتی ہے کہ اس کے باشندوں کو بنیادی حقوق سے محروم کر دیا جائے اور ان کی آزادی سلب کر لی جائے۔

اقتباس : وندے ماترم کا مسئلہ (حب الوطنی یا شرک) 
از: محمد ساجد صحرائی

ہم نے چھوٹے چھوٹے بچوں کو تتلاتے دیکھا ہے۔بچوں کی زبان سے تتلانا ان کے بچپن کی پیاری حرکتیں ہوتی ہیں جو ہر ذی روح انسان کو نہ صرف خوش کرتی ہے بلکہ اگر باپ ہو تو دن بھر کی تکان کو لمحوں میں خوشی ومسرت میں تبدیل کردیتی ہے۔تتلانے کی اس عادت کو بچہ اگر لڑکپن میں بھی باقی رکھے تو وہی والدین فکر مندی کا شکار ہوجا تے ہیں اور ماہر طبیب کی تلاش کرتے ہیں کہ بچہ کا یہ نقص فوراً دور ہو۔گویا بچپن کا بچپنہ لڑکپن میں معیوب ہوجاتا ہے بلکہ والدین کے لیے فکر مندی اور پریشانی کا باعث بن جاتا ہے۔
اگر یہی تتلاپن کسی ایسے شخص میں آجائے جو دنیا کی سب سے بڑی جمہوریت کے اہم ستون میڈیا کی نمائندگی کرتا ہوتو آپ کیا کہیں گے؟میں بات کررہا ہوں ”دیپک چورسیا“کی جو ایک ٹی وی چینل پر تبلیغی جماعت کوطالبانی جماعت کہہ کر پکار رہے تھے۔اور بالکل ایک نٹ کھٹ بچے کی طرح جب توجہ دلائی گئی تو سرے سے انکار ہی کردیا۔
بھارت میں کورونا جس دھیمی رفتار سے چل رہا تھا،دہلی حکومت اور ملک کے مرکزی نیوز چینلوں کے دانستہ طور پر مرکز نظام الدین کو ہدف بنانے کے بعد اپنی پوری تیزرفتاری کے ساتھ ملک کے طول و عرض میں پھیل رہا ہے اور اب وہ اندیشے سچ ثابت ہوتے دکھائی دے رہے ہیں جو بین الاقوامی صحت عامہ کے ادارے نے ظاہر کیے تھے۔گویا کورونا کو بھارت میں کسی ایسے مذہب کی تلاش تھی جو اپنے حریف کی دشمن کا شکار ہو،وہ دشمن ملکی میڈیا نے اسے مہیا کرادیا۔اب ملک کے طول وعرض میں پوری سرگرمی کے ساتھ یہ پروپیگنڈا پھیلایا جارہا ہے کہ ملک میں کورونا مسلمانوں کے ذریعہ پھیل رہاہے۔
دراصل ملک کے الیکٹرانک و پرنٹ میڈیا نے ہندوتوا نامی جس خوں آشام بھیڑیے کے منہ کو مسلمانوں کا خون لگادیا ہے،اب یہ ان کی مجبوری ہے کہ وقتاً فوقتاً اس بھیڑیے کو غذا مہیا کراتے رہیں۔مرکز نظام الدین کو بدنام کرنے کے پیچھے دراصل یہی سوچ کام کررہی ہے۔
مرکز نظام الدین کے خلاف اس جھوٹ کا مقابلہ خود تبلیغی جماعت کی مرکزی قیادت کو سامنے آکر کرنا ہوگا۔ تاکہ مسلم قیادت ان کے شانے سے شانہ ملا کر ساتھ دے سکے۔
جھوٹ کے اس پلندے کے ساتھ مسلم دانشوران و علماء کرام کو اس پر بھی غور کرنا چاہیے کہ آخر تبلیغی جماعت جیسی بے ضرر، نماز و روزہ کی دعوت دینی والی اور سیاست کی س سے بھی نابلد جماعت سے بھلا حکومت کو کیا بیر ہوسکتا ہے۔ایسی جماعت جس کی چلت پھرت میں مسلم معاشرے کے وہ لوگ زیادہ حصہ لیتے ہیں جو سماج کے نچلے طبقہ سے تعلق رکھتے ہیں،جن سے یہاں کے اسلام سے بیر رکھنے والوں کا کوئی لینا دینا نہیں۔اس سوال کے جواب کے لیے آپ کو تبلیغی جماعت کی جماعتی ترکیب پر غور کرنا ہوگا۔آج پوری دنیا میں جہاں جہاں بھی غلبہ دین اورمسلمانوں کی اصلاح وتربیت کی کوششیں ہورہی ہیں وہ سب قومی، ملکی اور قانونی حدود کے پابند ہیں۔بلکہ یہ کہنا زیادہ درست ہوگا کہ امت واحدہ کا تصور ناپید ہوچکا ہے یا کم از کم عملی طور پرناکام ہوچکا ہے۔سب جماعتوں کی اپنی مجبوریاں ہیں، اپنا دائرہ کار،طریقہ کار،اور حدود کی پابندیاں ہیں۔یہ سارا انتشار اس کے باوجود ہے کہ ان میں فکری ہم آہنگی پائی جاتی ہے۔مثلاً اخوان المسلمون تقریبا پوری عرب دنیا میں پائی جاتی ہے، جماعت اسلامی کم وبیش پوری مسلم وغیر مسلم دنیا میں پائی جاتی ہے۔اس کے باوجود سب ملکی حدود اور وہاں کے قانون کے پابند ہیں۔ان پابندیوں ہی کی وجہ سے ان کے امراء بھی جدا جدا ہیں۔اس امارت کے انتشار سے تبلیغی جماعت پاک ہے۔…………حالانکہ اب امت کا یہ دھڑا بھی دو حصوں میں بٹ چکا ہے……… اس زاویہ نگاہ سے دیکھا جائے تو مرکز نظام الدین کا گھیراؤ محض کسی ایک جماعت کا گھیراؤ نہیں ہے بلکہ یہ امت واحدہ کا گھیراؤ ہے۔ یہ اس امت مسلمہ پر شب وخون مارنے کی ناکام کوشش ہے جو پوری دنیا میں پائی جاتی ہے۔ مرکز نظام الدین کو بدنام کرنا جہاں ہم مسلمانان ہند کے لیے حساس مسئلہ بن گیا ہے، اس سے زیادہ بھارت کے نظام اور ملک کے صاحب اقتدار حضرات کو غور کرنا چاہیے کہ کیا وہ ملک کو مسلم دنیا میں اسلام دشمن ملک کے طور پر متعارف کرانا چاہتے ہیں؟ ملک کا میڈیا جس تیزی رفتاری کے ساتھ تبلیغی جماعت کو کٹہرے میں کھڑا کرنے کی ناکام کوشش کررہا ہے کیا وہ نہیں جانتے کہ مسلم دنیا ان کی یہ مکاری کھلی آنکھوں سے دیکھ رہی ہے؟ یا پھر خود مسلمانوں کو امت واحدہ کے تصور کی طرف لوٹنا پڑے گا۔ایک ایسی امت جس کی کوئی حد، کوئی رنگ، کوئی نسل اور کوئی مخصوص ملک نہیں ہوتا بلکہ فقط "الارض للہ والملک للہ والحکم للہ"

بالآخر بابری مسجد پر سپریم کورٹ کا فیصلہ آہی گیا۔ یہ عدل نہیں، نہ انصاف ہے بلکہ سیاسی ظلم کا شاہکار ہے۔ آخر سپریم کورٹ نے ملک کے سب سے طویل عرصے سے چل رہے سب سے حساس مسئلہ پر فیصلہ دیا ہے۔ آغاز میں یہ تاثر دیا تھا کہ کسی بھی فریق کی آستھا کے مطابق نہیں بلکہ حق ملکیت کے مطابق فیصلہ دیا جائے گا۔ 

فیصلہ

(۱) متنازع زمین 77.2 ایکڑ رام للّا (ہندوؤں )کو دی جائے۔

(۲) حکومت ۳ ماہ میں ٹرسٹ بنائے اور مندر کی تعمیر ہو۔

(۳) مسلمانوں کو 5ایکڑ زمین ایودھیا میں دی جائے۔

اس فیصلہ کو جس بنیاد کی وجہ سے دیا گیا ہے اس کا ذکر بھی مختصراً ضروری ہے۔

(۱) ASIآثارِ قدیمہ کی تحقیقاتی رپورٹ کو بنیاد بنایا گیا ہے۔

(۲) رام چبوترہ کو جنم استھان تسلیم کیا جانا۔

(۳) رام کی پیدائش کا ایودھیا میں ہونے کی آستھا جو ہندوؤں کی ہے۔

سپریم کورٹ نے شیعہ وقف بورڈ کے دعویٰ کو خارج کیا۔ اسکے بعد نرموہی اکھاڑے کے دعوے کو غیر قانونی قرار دیا۔ سنی وقف بورڈ کو بھی خارج کر دیا۔ اب جو باقی بچا تھا وہ ’’رام للّا براجمان‘‘ اسے باقی رکھا اور اس کے حق کو تسلیم کر لیا گیا۔

الٰہ آباد ہائی کورٹ کی لکھنؤ بنچ نے جو فیصلہ 2010ء میں دیا تھا اس کی بنیاد ہی ASIکی رپورٹ تھی۔ جس میں کئی چیزیں تھیں جس پر Objection لیا جانا چاہئے تھا لیکن اس پر Objectionنہیں لیا گیا۔ ان ہی کو سپریم کورٹ نے آدھار بنا ڈالا۔ مثلاً کھدائی میں بابری مسجد کے نیچے پرانے Structureکو بتلایا گیا ہے کہ وہ ہندو مندر جیسا ہے۔ جبکہ وہ بدھ وہار کی تعمیرات بھی ہوسکتی ہیں۔ مورتیوں کے ٹکڑے اور سنسکرت لکھی ہوئی پلیٹیں، اسکے علاوہ ہڈیاں، انسانی ہڈیوں کے ڈھانچے بھی برآمد ہوئے ہیں لیکن ’’ہندو مندر جیسا‘‘ کو آدھار بنایا گیا ہے۔

سپریم کورٹ نے کہا ہے کہ 1857 سے قبل مسجد میں نماز پڑھنے یا پڑھانے کے کوئی ثبوت نہیں ملے۔ جبکہ مسجد مل جل کر نماز پڑھنے کے لئے ہی بنائی جاتی ہے۔ 1857کا دور مسلم دور تھا ۔ کیسے ممکن ہے کہ وہاں نماز نہ ہوتی ہو؟

علی الرغم فیصلے کے سپریم کورٹ نے کچھ Observationبھی کوٹ کئے ہیں۔ جنکا فیصلے میں خیال نہیں کیا گیا۔

(۱) بار بار ’’مسجد‘‘ کا لفظ استعمال کیا گیا۔ (کم از کم 3 1بار) اور آخر میں اسکی زمین ہندوؤں کو دے دی گئی۔

(۲) مسجد کی عمارت کے وجود کو تسلیم کیا گیا۔

(۳) مسجد کے اندرونی حصہ میں نماز پڑھی جانے کو بطور ثبوت تسلیم کیا گیا ہے۔ بالخصوص 1857 سے 1949 تک۔

(۴) ۲۲۔۲۳؍دسمبر ۱۹۴۹ء کی درمیانی رات کو مورتیاں لاکر رکھی گئی تھیں۔ FIRوغیرہ کو On Record لیا گیا اور اِسے جرم کہا گیا۔ 

(۵) ۶؍ دسمبر ۱۹۹۲ءکو کار سیوکوں نے مسجد شہید کی اس جرم کو بھی تسلیم کیا گیا ، اسے بھی Recordپر لایا گیا۔

(۶) ASIرپورٹ کی بنیاد پر سپریم کورٹ نے یہ صاف کر دیا کہ بابری مسجد کسی مندر کو توڑ کر نہیں بنائی گئی تھی اس کا کوئی ثبوت موجود نہیں ہے۔

ان تمام سچائیوں کو ریکارڈ پر لانے کے باوجود سپریم کورٹ نے مسلمانوں کو ان کی مسجد و زمین سے بے دخل کر دیا۔ قانون کے ماہرین یہ بتلا رہے ہیں کہ ایسا کورٹ نے دفعہ 142 کے ذریعہ حاصل شدہ اختیارات کو استعمال کیا اور یہ فیصلہ دیا۔ کیا اتنے سارے شواہد و ثبوت کی روشنی میں دفعہ 142 کے ذریعہ سپریم کورٹ ایک بنیادی حق سے مسلمانوں کو محروم کر سکتا ہے؟ اس فیصلے کے خلاف دانشوروں ، سابق ججوں، وکیلوں اور ماہرین نے زور دار آوازیں بلند کرنی شروع کر دی ہیں۔ممکن ہے یہ صدائیں بڑھ کر زبردست احتجاج میں تبدیل ہو جائیں۔ غیر مسلموں کے ساتھ اب مسلمانوں نے بھی اس فیصلہ پر سوال اٹھانا شروع کر دیا ہے۔ کیرالہ اور دہلی میں عملاً احتجاج بھی ہو رہے ہیں۔ مسلمانوں کو ان آوازوں میں اپنی آواز ملانی چاہئے اور وقت کے اس پہر کو غنیمت جاننا چاہئے۔ 

مسلم پرسنل لاء بورڈ، جمعیت العلماء ہند و غیرہم کو نظر ثانی کی اپیل میں جانا چاہئے اور 5 ایکڑ زمین کو یکسر مسترد کر دینا چاہئے۔ کیونکہ مسجد کے بدل میں 5 ایکڑ کیا 50 ہزار ایکڑ زمین بھی نہیں لی جاسکتی۔ اگر بابری مسجد کے بدل میں کچھ بھی قبول کیا جائیگا تو وہ دین و شریعت کے خلاف ہوگا۔

عدالت کے اس فیصلے نے بابری مسجد کے سامنے خود سپریم کورٹ کو کھڑا کر دیا ہے اور نفس مسئلہ ختم نہیں ہوا بلکہ یہاں سے اسکی شروعات ہو رہی ہے۔

مسلمانوں کو 6 دسمبر کو پوری مضبوطی اور سنجیدگی سے یہ مطالبہ کرنا چاہئے کہ بابری مسجد کے قاتلوں کو سزا دی جائے۔اور اسے دہراتے رہنا چاہئے تاکہ یہ ظلم صدا یاد رہے۔ زخم ہرے رہیں اور اس سے رستا ہوا مواد یہاں کے حکمرانوں ، انصاف کرنے والوں اور نظام چلانے والوں کی گندی ذہنیت کی عکاسی کرتا رہے۔

یہ فیصلہ ثبوتوں اور دلائل پر نہیں ہندوؤں کی آستھا پر دیا گیا ہے۔ اس لئے مسلمان اسے مسترد کرتے ہیں۔ 

ضیاء الدین صدیقی-اورنگ آباد